（Tē 1 pha）
「阿美你好，我是阿雪，ah 你最近好 -- 無?」阿雪講。
「我最近無好--neh！感覺足 bái--ê !」阿美講kah 足傷悲 --ê。
「我就 hō͘ 查埔騙，感覺有夠傷心 --ê!」阿美 lú 講lú 細聲。
「阿美，tōe 一 ê 查埔 kā 你食生跤，我chhōe 伊算數!!」阿雪講 kah 足生氣 --ê。
「Aih，我就傷 gōng-tuh-tuh，A-chún 講伊是愛我 --ê，結果我發現伊有女朋友 --á，我 khah 感覺 hō͘ 騙去--ah!」阿美講 kah 流目屎。
「阿美，我 hām 你交情嘛beh 10 冬--ah，你彼 ê 時陣 thài-ē 無 chhōe 我講neh?」阿雪講kah 足kiaⁿ-hiâⁿ--ê。
「Aih--ah，愛著較慘死--lah!」雄雄阿竹出現 tī邊仔teh 大聲講!
這 ê 時陣，阿美kap阿雪sa-lóng-bô，阿竹是啥物時陣puh 出來lah! In lóng hō͘ 阿竹仔驚驚 -- 著!
「Aih iah，lín ê 膽有夠細粒 --ê，我只是 kā 事實講出來爾，敢講我有講 m̄-tio̍h o͘h?」阿竹蓋成講 kah 足 chhio-tiô--ê。
「阿竹仔，你實在是 hoⁿh………m̄-chai beh 按怎講你 neh?」阿雪心內是有一點仔受氣。
阿美看著彼 ê súi-bīn ê 阿竹，是規pak-tó͘ 火，心內想：「你這 kho͘ 真正足傷 beh kā 伊 pa--lo̍h-khì--ê!」
這 ê 時陣阿竹看 in 2 ê 人ê 面腔足歹看 --ê，就想 beh soan--ah。
（Tē 2 pha）
阿竹 teh 想空想縫 beh 創治阿美，結果 soah hō͘阿雪看破手跤。阿雪是一ê 頭殼足好ê 人，伊早就chai-iáⁿ 阿竹仔想beh變空。
這時，男主角出現 --ah，彼ê 騙阿美ê 人就是伊，名叫做膨風。彼 ê 膨風逐位去欺騙 tsô͘ gín-á，阿美就是其中一ê。
彼ê 阿竹仔看著膨風來--ah，趕緊kā 伊 giú去邊仔，細聲kā講：「Eh，你 m̄-sī 無女朋友? thài--ē kā 阿美仔騙ah!你敢chai-iáⁿ 伊哭 kah sì-liân-suî，suà--lo̍h-lâi你beh按怎面對伊--leh!」阿竹其實mā 會煩惱，因為伊 tī 暗中teh kah-ì 阿雪，伊無想beh hō͘阿雪 ê 好朋友艱苦，想beh khah有面子 --ê。
（Tē 3 pha）
阿美 kap 阿雪行tī路中，2 ê 人 lóng teh 想，想講 beh án-ná 出一口氣。
行 leh 行 leh，tī oat-kak ê 雜細店拄著膨風，這時阿美看著伊是規 pak-tó͘ 火，伊 koh m̄-chai-iáⁿ膨風kā 騙講伊有女朋友ê 代誌。這聲若是hō͘ 阿美chai-iáⁿ，伊就chhoah teh 等--ah! 而且這 ê 嘛m̄-sī 真正ê 女朋友。
Tng-tong in koh teh 想 ê 時陣，彼 ê 講是膨風ê 『女朋友』ê 姑娘仔 tī 對面ê 巷仔口 ta̍uh ta̍uh-á 行向in 3 ê 人!
膨風看 m̄ 是勢，就趕緊soan-cháu--ah! 彼 ê 講是膨風 ê 女朋友名叫做阿花。阿美看著阿花，家己感覺：「伊hiah爾súi， 我比 bē 過伊--lah!」其實阿美kan-taⁿ 看過伊一面爾爾，這時阿雪想講，彼ê膨風是出運ah o͘h! Hiah爾 súi ê查某逐 ê m̄-káⁿ 相信是伊 ê 女朋友! 想講伊sī-m̄-sī kā 逐 ê 騙! Kā 逐ê 騙 kah lin-long-se̍h，只有阿竹仔 tsai-iáⁿ 事實。
（Tē 4 pha）
Tī 這 ê 複雜ê 4 ê 人，差不多20 歲ê 愛， in是beh按怎繼續 --lo̍h-khì neh? 感情是真複雜 --ê，taⁿ in才chai-iáⁿ 啥物是真 ê iah 是假 --ê。
M̄-koh 講著膨風伊ê 行為實在足無應該 --ê。阿雪後來kap 阿美仔 chheh-sim--á，阿美嘛chai-iáⁿ，in koh 恢復in ê正常ê 生活-- ah!
＊刊tī台文通訊罔報(Tâi-bûn thong-sìn Bong-pò)第290期
ns 18.68.41.142da2
